KIEK
Karaisa Iŋgoroca Eacrena Kambmo Ion Mbuŋa Moa Larurina
Outna kam
Gan timbigta kapca mina tirrinanna, an mɨnna mina Iesusa rɨpacrena laiplacarmo, mo ŋgocrairena, na anna mɨnɨŋa gaind, an Iesusa rɨpacrena laiplacara mina gainda rɨpacrena, Iesus Karaisa ma mina Kacoot. Na gan timbigta kapca ma Iesusa rɨpacrena laiplacarta rɨtɨpaikca mo gagaranande, te, makukar anikmo mba wattacarica, ma minmo mba mo irikitndai.
Na gan timbigta kapca ma ŋgagatracna kamb rourta reik wɨtta iŋmbaia lataruna kambap. Na an kɨdrɨkca Iesusa rɨpacrena laiplacara mina an ŋgagatracna kamb rourmo mina garacrena, na rɨtɨpac ŋgocorta meikramtaɨra wanaiŋ. Na an ŋgagatracna kam roora gaind, Iesus Karaisa ma Kacoot, na mana par mbuŋa Raraŋ Aetaniaca puŋnaŋgeparmo muruŋcamiŋapa, Ramoot Mbɨk, tocmo mo iriknande. Na an mɨnna Iesusa ndona aiŋa moi mai te, Raraŋ Aetaniaca ma an meikramtaɨra mina gagaraca eacrinanapa, ndorita rɨtɨpaca mba tɨkcarirenanmo, ma minmo opoik anikmo neaŋnandet. Na mina Raraŋ Aetaniacap eac te, mina makukar anikca mba mac aŋgɨitndai, anna Raraŋ Aetaniaca ma reikmo muruŋa moi ŋgaib tarunandet.