2 Korin
Pola Korinnandmo iŋmbaia mac tiratna timbiŋ rapar
Outna kam
Korin auŋ aniacna Iesusna rɨtɨpaikta meikramtaɨrta tumbunna ndeida Polmo kam ŋgoreac ndopri, anna ndo Polmo moa kadmairina. Aintik ma gan timbiŋ rapara minmo tirrina, na ma minapmo kamb wandoŋaina, te, ma minmo mac toŋgonande.
Na gan timbiŋ raparna inikna outna kamb tɨpembca, Pola ŋgaua ma Korinnandapmo, mbopatna kamb gargara ma minmo an mac mbopatna. Na ma an kamb ndopna karirina, anna gaind, mina garuruca mina manmo kamb ŋgorikca mboprinan tik. Ainda moca ma minmo kam gargar ndoprina. Ri, mina mana kamb mbaraca ndorita tɨpemb kirarirmo ŋgetrikirina. Aintik mandeaca ma toŋtoŋ ŋgoin.
Na an mɨnna Iudiana pitrik waŋna Iesusa rɨpacrena laiplacara laŋa mba eacri. Aintik Pola min ŋgotacna moca kɨtcaɨrtukar iua aŋgɨca taŋga minmo neaŋna. Ainda moca gan timbiŋ raparna inikna sapta 8na mɨnna tɨkca taŋca sapta 9na mɨn, na Pola ma Korinnanta iroar inkara moi ŋgepna kamb ndoprina, te, mina an aiŋna moca kitukndukara neaŋna.
Na gan timbiŋ raparna mamamaia, Pola an paparuna up aŋgɨrena ramtaɨr ndeida kɨpca Korin auŋ aniaca eaca, mina Polna imo mo irikrinan, na mana up aŋgɨrena ramtaɨrta aiŋmo pepererenan.