उत्पत्ति
उत्पत्ति
लिखने बालो
यहूदी परमपरा ते पवित्रशास्त्रेरे बाकी लिखनेबालां केरे मुताबिक पुराने नियमेरी पेइली पंच़ किताबां ज़ैन जो पंजग्रनथ ज़ोतन, तैन केरो लिखने बालो मूसा आहे। पवित्र आत्मा मूसा प्रेरित कियो कि इना किताबां लिखे। हकीकति मां परमेशर इन केरो असली लिखने बालोए। ज़ै सन्देश परमेशरे सब इन्सानन दित्तो इनां पंच़ किताबां तैसेरो हिस्सो आन। इन पंच़ किताबन जो इब्रानी भाषाई मां तोराह ज़ोतन, ज़ेसेरो मतलब शिक्षा देनी या कानूने। यूनानी भाषाई मां इन किताबन पेन्टाट्यूक ज़ोतन। मूसा इस्राएलेरो नबी ते मिस्रेरे गुलैमी मरां इस्राएली लोकन आज़ाद केरनेबालो थियो, मूसा 1526 ई. पू. मां मिस्र मुल्खे मां ज़र्मो। ते यहोवा परमेशरे सेइं साथी तैसेरो मज़बूत रिश्तो इस खियालेरो समर्थन केरते कि मूसा इन पंच़ किताबरो केरो लिखने बालोए। यीशु मसीहे एप्पु (यूह. 5:45-47) ते तैसेरे वक्तेरे फरीसी ते शास्त्री लोकेईं भी (मत. 19:7;22:24) मूसा एसेरो लिखने बालो मन्नो। उत्पत्ति किताबरे वंशावली एरे मुताबिक तैसेरू ज़र्म 1000 साल बाद भोवरू थियूं, (मतलब दुनिया बनानेरे 1650 साल बाद तैसेरू ज़र्म भोवं।) मिस्रेरे शाही मेहले मां मूसा शिक्षा हासिल की (प्रेरित. 7:22)
लिखनेरी तारीक ते जगाह
1446 करां 1405 ई. पू. मां ई किताब लिखी जेई।
भोइ सकते कि ज़ैस साले इस्राएली लोकेईं 40 साल सीनैरे सुनसान ठारी मां डेरे लेवरे थिये, तैस वक्ते मूसा ई किताब लिखी।
शुन्ने पढ़नेबाले
ई किताब मिस्रेरे गुलैमी मरां आज़ाद भोइतां कनान मुल्खे मां गानेबाले पेइले इस्राएली केरे लेई ते एजने बाले वक्ते मां पवित्रशास्त्र पढ़ने बालां केरे लेई लिखी जेई।
मकसद
मूसा ई किताब अपनि इस्राएली कौमरे “घरानेरो इतिहास” हिरानेरे लेई लिखोरी थी। उत्पत्ति किताब मूसेरो मकसद इन हिरानू थियो कि इस्राएली कौम ज़ैस तरीके सेइं मिस्रेरे गुलैमी मां थी (उत्प. 1:8), ते इन भी कि तै मुल्ख ज़ैस मां तैना गानेबाले थी तैन केरे “वाधो कियोरो मुल्ख” किजो थियो (उत्प. 17:8), तै इन भी हिराते कि इस्राएले सेइं ज़ैन किछ भी भोवं तैन सेब्भन पुड़ परमेशरेरी हुकूमत थी, ते मिस्रे मां तैन केरि गुलामी एन्च़रे भोने बाली बीतना नईं बल्के परमेशरेरी बड़ी योजनारो अक हिस्सो थियो (उत्प. 15:13-16;50:20), इन हिराते कि अब्राहमेरो परमेशर, इसहाकेरो परमेशर ते याकूबेरो परमेशर तैए, ज़ैने दुनियारी रच़ना की। (उत्प. 3:15-16) इस्राएलेरो परमेशर तैए आहे ज़ैनी अम्बर ते धेरतरी रच़ना की।
खास मुद्दो
शुरुआत
रूपरेखा
1. सृष्टि रच़नेरो इतिहास 1:1—2:25
2. पाप ते दुखेरी शुरुआत 3:1-24
3. आदमेरी पीढ़ी 4:1—6:8
4. नूहेरी पीढ़ी 6:9—11:32
5. अब्राहमेरो ज़िक्र 12:1—25:18
6. इसहाक ते तैसेरे मट्ठां केरो ज़िक्र 25:19—36:43
7. याकूबेरी पीढ़ी 37:1—50:26