JHN intro

3.0

ယောဟန်

ရေးဟှားဟှူ ခရစ်တော်ရဲ့ ဒန်းကောန်း

နိဒါန်း

ယောဟန် ရေးဟှားဟှူ ခရစ်တော်ရဲ့ ဒန်းကောန်းဟှာ ယေရှုခရစ်တော်ရဲ့ သတ်တော်စဉ်ဟှို ဖော်ပြဟှားဟှူ ဓမ္မသစ်ကျမ်းထဲမာ ကျမ်းလေးစောန်ထဲဟှ တစောန်ဖြစ်ဟှယ်။ အယ်ကျမ်းတစောန်စီဟှို “ဧဝံဂေလိ” ဆိုဘီး ခေါ်ဟှယ်။ “ဒန်းကောန်း” ဆိုဘီး အဓိပ္ပာယ်ရဟှယ်။ ယေရှုသေဆောင်းဘီးန အယ်ကျမ်းလေဟှို မဿဲ၊ မာကု၊ လုကာန ယောဟန်ဟှ ရေးဟှားဟှယ်။ ယောဟန်ရေးဟှူ ဒန်းကောန်းဟှာ ခရစ်တော်မွီးဘီးန နှစ်ပေါန်း ၉၀ ဝန်းကျင်လော့‑က်မာ တမန်တော်ယောဟန်ဟှ ရေးဟှားဇာဖြစ်နိုင်ဟှယ်။ အယ်ကျမ်းမာ ယောဟန်ဟှာ ကျမ်းရေးသူဖြစ်ဟှယ် ဆိုဘီး ပြောဟှားဘေမဲ့လည်း စာရေးသားပေါင်စံဟှာ ယောဟန်ရဲ့ ပထမပေးစာ ယောဟန်ရဲ့ ဒုတိယပေးစာ၊ ယောဟန်ရဲ့ တတိယပေးစာန ရရာတိုင်း တူညီလေဟှယ်။ ယောဟန်ဟှာ အယ်ခီဒူးဟှ ဧဖက်ဗြို့မာ နေဟှူကြောန့် အယ်ကျမ်းဟှို ဧဖက်ဗြို့မာ ရေးဟှားဇာဖြစ်မယ် ဆိုဘီး ရှေးခတ်စာရေးဆရာလေဟှ သတ်မှတ်ဂေ့ဟှယ်။

ယေရှုဟှာ သတ်ရှင်ဟှူ ဘုရားသခင်ရဲ့သားတော် (၂၀.၃၁)၊ ခရစ်တော်ဖြစ်ဟှယ် ဆိုဇာဟှို လူလေယောင်ကြည်အောန် ကူညီဟှို့တွပ် ဖြစ်ဟှယ် ဆိုဘီး ယောဟန်ဟှာ အယ်ကျမ်းရဲ့ ရည်ရွယ်ချစ်ဟှို ရှင်းရှင်းလန်းလန်း ဖော်ပြဟှားဟှယ်။ အယ်မျိုး ယောင်ကြည်ဇာအားဖြင့် နို့လေဟှာ ကိုယ်တော်နာမနှိုက် အသတ်ဟှိုရမယ်။ အယ်ကျမ်းဟှာ ယုဒလူမျိုးလေန ယုဒမှုဘဲဟှူလူလေ နှေ့မျိုးလောင်းတွပ် ရေးဟှားလေဟှယ်။ ယောဟန်ရဲ့ ဒန်းကောန်းကျမ်းဟှာ တချို့နေရာလေမာ တခြားဒန်းကောန်း သောင်းစောန်န ရရာတိုင်း ကွာခြားလေဟှယ်။ သူဟှာ ယေရှုလောက်ဆောန်ဟှားဟှူ နိမိတ်လက္ခဏာဟှို ရေးဟှားဘီး ကိုယ်တော်ရဲ့ ပေါန်ဥပမာလေကြောန်းဟှို ဘောင်ဂီးရေးဟှမ်း။ ယေရှုရဲ့ဗတ္တိဇံခံဇာန တောကန္တာရထဲမာ စောန်စမ်းခံရဇာလေမျိုးနတူဟှူ တခြားအဓိကဖြစ်ပျစ်လေဟှိုလည်း အယ်ဒန်းကောန်းထဲမာ ရေးဟှမ်း။

ကြောန်းရာ ကျဉ်းချောက်

၁။ ယောဟန်ဟှာ အယ်ဒန်းကောန်းကျမ်းဟှို အခန်းဂီး ၁ ထဲမာ စပြုဟှားဟှူကြောန်း (၁.၁–၁၈)

၂။ အယ်ဘီးန သူဟှာ ယေရှုလောက်ဆောန်ဟှားဟှူ နိမိတ်လက္ခဏာလေ အမျိုးမျိုးကြောန်းဟှို ရေးဟှားဟှူကြောန်း (၁.၁၉—၁၂.၅၀)

၃။ နော့‑က်ဘီးဟှာ သူဟှာ ယေရှုရဲ့ သတ်တော်စဉ်ထဲမာ အဖြစ်ပျစ်လေမျိုးမျိုးဟှို ဖော်ပြဘီး ကိုယ်တော်ရဲ့ သေခံဇာန ထမြော့‑က်ဇာထိ ဆွဲခေါ်ဟှားဟှူကြောန်း (၁၃.၁—၂၀.၃၁)

၄။ ယောဟန်ဟှာ ယေရှုရဲ့ သေရာဟှနေ ထမြော့‑က်ဘီးန လူလေဟှို ထန်ရှားပြဇာလေ ဘောင်ဂီးထဲဟှ တခုဟှို ပြောပြဘီးဟှာ အယ်ကျမ်းရေးဟှားဟှူ သူ့ရဲ့ ရည်ရွယ်ချစ်ဟှို ဖော်ပြလိုက်ဘီး အယ်ဒန်းကောန်းဟှို အခန်းဂီး ၂၁ မာ အဆောန်းသတ်လိုက်ဟှူကြောန်း (၂၁.၁–၂၅)