Hibru
Akɨnafarir Hibrun Gumazamiziba Bagha Zuim
O
Hibru
Akar faragha zuim
Judabar marazi faragha uan navibagh iragha Kraisɨn gɨn zui, egha datɨrɨghɨn uan nɨghnɨzir gavgavim ataghɨraghasava ami. Kamaghɨn, akɨnafarir kam gumazir mam o amizir mam me bagha an osiri. E fozir pu, tinaram an osiri, akɨnafarimɨn aven gumazim o amizim uan ziam dɨborozir puvatɨ. Marazi ghaze, Pol, o Barnabas, o Apolos, o Prisila, men tav ti an osiri.
Gumazir maba Kraisɨn gɨn zuir gumazamiziba dɨkabɨra egha osɨmtɨziba me ganɨdi. Akɨnafarir kam men nɨghnɨzir gavgaviba gavgavim dar anɨngasa, kamaghɨn amizɨ, a ingangarir ekiar God Krais Iesusɨn aven amizim, gun me mɨgei. Kraisra guizbangɨn Godɨn arazim en akakasi.
Ezɨ akɨnafarir kam bizir ekiar pumuning ko mɨkezim mɨgei. 1. Iesus a guizbangɨra Godɨn Otarim. Dughiar Iesus nguazimɨn itim, an osɨmtɨzir avɨriba ko mɨzaziba ini. Ezɨ arazir kamɨn God Iesus gamizɨ, a gumazamizibar akurvaghamin faragha zuir gumazimɨn oto. (2:10) Egha Iesus akam inigha izir gumazir fomɨra itiba ko enselba ko Moses gafira. 2. God uabɨ Iesus amɨsevezɨ a ofa gamir gumazimɨn ikɨ mamaghɨra ikiam, egha a Judabar ofa gamir gumazibagh afira. 3. Iesus a Godɨn Nguibamɨn Ofa Gamir Gumazibar Dapanimɨn iti. Egh gumazamizir nɨghnɨzir gavgavim an itiba, a ua me iniam. Moses Osirizir Araziba, God bagha ofa gamir arazibar gun mɨgei, da pura Iesus amizir ingangarir ekiar kamɨn nedaziba.
Akɨnafarir kam gumazamizibar nɨghnɨzir gavgavim, gavgavim dar anɨngasa. Kamaghɨn amizɨ, a Israelian gumazamizir fomɨra itibar nɨghnɨzir bar gavgavimɨn akaba iti (sapta 11). A ghaze, markɨ, osɨmtɨzir manam me bato, me uan nɨghnɨzir gavgavimɨn suiraghvɨra ikɨ mangɨva ovengegh. Me Iesusɨn gan an arazibar gɨn mangɨ, egh osɨmtɨziba ko mɨzazir me isiba batogh.