ISA intro

ዒሲያሴ ማፃኣፖ

ዓይፆ ካሮ

ፆኦሲ ማሊፆ ኬኤዛ ዒሲያሴ ማፃኣፓ ኪሪስቶሴ ሾይንታንዳሢኮ ቤርታ ፄኤቶ ፄኤቶ ሌዖ ፓይዶኮ ሳላሳ ፄኤቶ ሌዖ ጋፒንፃ ዬሩሳላሜይዳ ናንጋ ፆኦሲ ማሊፆ ኬኤዛ ዼኤፖ ዓሢ ሱንፆና ዔኤሊንቴያኬ፤ ሃና ማፃኣፔላ ሃይሦ ዼኤፒ ቤሲ ፓቂንታኒ ዳንዳዓኔ። ዬንሢያ፦

1. ዓይሢ 1—39 ሄላንዳኣና ዓኣዜላ ዓጮኮ ዾኦሎ ዛሎ ዪሁዳ ካኣታ ዎልቄና ማዔ ዒዞኮ ዓሺኖ ዓሶኦሬ ዓጮ ካኣቲ ዒዞ ዖላንዳያ ማዔሢ ኬኤዛያኬ። ዒማና ሜታሢ ዪሁዳ ሄሌሢ ዓሶኦሬ ዓጮ ካኣቲኮ ዎልቃዺፆፓቱዋንቴ ዴሮኮ ጎሞና ፆኦሲም ዓይሢንቲፆ ዒፂፆናሮ፤ ዬያጉዲ ሃሣ ዔያቶኮ ፆኦሲዳ ዓኣ ጉሙርቂፃ ፓጬያ ማዔሢ ዒሲያሴ ዛጌኔ፤ ፔጋዺ ዔርቴያ ማዔ ጌኤሲና ማዾና ዴሮንታ ዔያቶኮ ሱኡጎንታ ፂሉሞና ፒዜ ማዔ ዎጌና ናንጊና ባንሢ ማዓንዳጉዲ ማሊሺሢና ፆኦሲም ዓይሢንቱዋ ዓቲፃ ላኣፑሞና ባይሲንታና ዔኪ ሙካንዳሢ ዒሲያሴ ዔያቶም ላታኔ። ቃሲ ሃሣ ዒሲያሴ ዒማና ኬኤዛዖ ሙካንዳ ዎዶይዳ ዓጪ ማዔ ካራናይዳ ቢያ ኮሺ ናንጊ ሚርጋንዳሢና ጎኑሞና ጌኤሹሞና ዎይሣንዳ ዳውቴ ዜርፃፓ ማዔ ካኣቲ ሙካንዳ ዎዴ ዓኣሢያ ኬኤዛኔ።

2. ዓይሢ 40—55 ሄላንዳኣና ዓኣ ቤዞኮ ባሼሢ ዪሁዳ ዴራ ባብሎኔ ዲዒንቲ ዔውቲ ሎኦሞንታ ሃጊ ማዓ ዎዛ ቲቂሢንታ ዔያቶ ሄላንዳሢ ዛሎዋ ኬኤዛኔ፤ ፆኦሲ ማሊፆ ኬኤዛሢ ፆኦሲ ፔኤኮ ዴሮ ዓይላታፓ ኬሳንዳሢና ሜሌ ዓኪ ናንጊ ናንጋኒ ሃንጋ ዬሩሳላሜ ማዖንዶ ዎዴ ዑኬሢያ ኬኤዛኔ፤ ዬንሢ ዓይፆንሢዳ ዼኤፒ ጴዻ ማሊፃ ሃይሶኮ ቢያ ዓዴ ፆኦሲ ማዔሢንታ ፔኤኮ ዴሮም ዒዛኮ ዓኣ ማሊፃ ዒስራዔኤሌ ዓሶ ዛሎና ሜሌ ዴሮም ቢያ ዓንጆ ማዓኒ ኮይሳያ ማዔሢ ኬኤዛ ቤዞኬ። «ፆኦሲ ዓይላሢ ዛሎ» ፃኣፒንቴ ባካ ሚና ጫኣቃሢ ማፃኣፓ ኬኤዚንቴ ዼኤፖ ኪኢቶ ባኣካ ማዒ ፓይዲንታያኬ።

3. ዓይሢ 56—66 ሄላንዳኣና ዓኣ ማሊፆኮ ባሼሢ ኬኤዛሢ ዬሩሳላሜ ዔያታ ማዒ ዓኣዼሢንታ ፆኦሲ ዒስራዔኤሌ ዓሶም ዒንጌ ሃጊ ማዓ ዎዞ ቃኣላ ቢያ ማዺንቲ ኩማንዳያ ማዒፆኮ ጎኑሞ ዔራኒ ኮዓ ዴሮ ዛሎኬ፤ ዱማዺ ዛጊንታንዳጉዲ ኮዒንቴ ማሊፃ ፂሉሞንታ፥ ፒዜ ዎጌንታ፥ ሃውሾ ኬሎ ቦንቺሢንታ፥ ፆኦሲም ዒንጎ ባኣዚ ዒንጊሢንታ፥ ዬያጉዲ ሃሣ ሺኢጲሢና ዶዲሢ ዛላኬ። ዬኖ ቤዞፓ ዔርቴያ ማዔ ቤዛ ዓይሢ 61፡1-2 ማዓዛ፥ ዬሱሴ ፔኤኮ ማዾ ዓይፆይዳ ዒዛኮ ዔኤሊንቲፆ ዛሎ ማርካ ማሂ ኬኤዜ ማሊፃ ዒኢካ ዓኣኔ።

ማፃኣፔላ ዱማ ዱማ ዓርቄ ባኮ

ዓይፆ ካሮ (1፡1-31)

ዪሁዳና ዒስራዔኤሌ ዓሶና ዛሎ ኬኤዚንቴ ኪኢታ (2፡1—5፡30)

ዪሁዳና ዒስራዔኤሌ ዓሶናም ቃሲ ኬኤዞና ኪኢታ (6፡1—12፡6)

ፆኦሲ ሜሌ ዴሮይዳ ሜቶ ዓጋንዳያ ማዔሢ (13፡1—23፡18)

ዋኣዪፆይዳ ዓኣ ፆኦሲ ዴሮም ሃጊ ማዓንዳ ዎዛ ኪኢታ (24፡1—27፡13)

ፆኦሲ ዋይዞ ዒፃ ዴሮይዳ ሜቶ ዓጋንዳያ ማዔሢ (28፡1—31፡9)

ፆኦሲ ዔኤዶሜ ዓጮይዳ ሜቶ ዓጊ፥ ዬሩሳላሜ ጋዓንቴ ዓንጃንዳያ ማዔሢ (32፡1—35፡10)

ዓሶኦሬ፥ ባብሎኔ፥ ካኣቲ ሂዚቂያሴንታ ዒሲያሴንታ ዛላ (36፡1—39፡8)

ፆኦሲ ፔኤኮ ዴሮ ዓውሳንዳያ ማዒፆ (40፡1—48፡22)

ፆኦሲ ዓይላሢ ዛላ (49፡1—53፡12)

ፆኦሲ ጫኣቄ ጫኣቁሞ ካፓንዳያ ማዒፆ (54፡1—55፡13)

ዴሬ ጉቤ ፆኦሲ ዒጊኒ ማዓኒ ዳንዳዓሢ (56፡1-8)

ፆኦሲም ጉሙርቂንቱዋ ሱኡጎይዳ ሜታ ሄላንዳያ ማዒፆ (56፡9—59፡21)

ዬሩሳላሜ ሃጋ ቦንቺንታንዳ ቦንቾ (60፡1—62፡12)

ፆኦሲኮ ዲቃሢ ሄርሺሳ ዓኮ ማዢንቶ (63፡1—66፡24)