Markos
Ya Madyaw na Ubat-ubatkan Jisu-Kristuna Pigsulat ni
Markos
Ya muna pagpa-edeꞌ
Ya muna migsulat sa Madyaw na Ubat-ubat kan Jisus, yan si Markos. Judiyu sakanan aw nyeyaꞌ silan ya ina nan adti Jérusalim. Pangkay bekeꞌ si Markos na apostol manang pigkilala nilan si Jisus aw nyangintu-u silan kanan. Mabasa yeiy adti Manga Pigpan-imoꞌ na Manga Apostolés 12:12.
Si Markos sambuk sakanan na kadégan ni Bérnabi. Mabasa adti Colosas 4:10. Aw nyagad uman sakanan kan Bérnabi adti manga banwa na pigpa-ede-an nan sa Madyaw na Ubat-ubat. Madég pa uman ya manga banwa na pigkadtuwan ni Markos dala ya syudad na Aléxandriya na awun ni Ihiptu, aw pigpalekat nan ya pagtipun sa manga utaw na un magsimba dun.
Na, paglabay da na madég na umay, nyakalabusu si Pablo adti syudad na Roma. Aw si Markos ya sambuk na tyumabang sa manga imo-unun nan. Mabasa adti 2 Timotiyo 4:11 aw Pilémon 24. Talana ni Markos dun ni Roma, pig-ubad nan ya ubat-ubat ni Pédro adti manga mangintu-uway na awun ni banwa na Italiya. Aw si Pédro uman ya migpa-edeꞌ kan Markos sa manga pigpan-imoꞌ ni Jisus, yanagaw paglabay da na manga katluwan (30) ya umay lekat adti pagkataw ni Jisus, pigsulat ni Markos ya Madyaw na Ubat-ubat.
Ya pigpadala͡an ni Markos sa sulat nan yeiy, yan ya manga utaw na Héntil. Aw yan ya to-o nan pig-iman na magkabagseg ya pagpangintu-u nilan pangkay dyumateng adti kanilan ya pagpamulayam.