1 Tésalonika
Ya Tagnaꞌ na Sulat ni Pablo adtimanga mangintu-uway na awun ni
Tésalonika
Ya muna pagpa-edeꞌ
Ya Tésalonika yan ya ulu asini muna na probinsiya na Macédoniya, na alag pigsakup na Roma. Madyaw ya pagpakabetang na Tésalonika kay awun dunggu-anan na manga barko dun.
Sa pagkadtu ni Pablo adti Tésalonika, eped nan si Silas aw si Timotiyo. Seled na tulungka simana, kada Allaw na Paglagdeng mig-ubat-ubat si Pablo adti sinagoga, aw awun madég na nyangintu-u kan Kristu. Ya talabahu ni Pablo yan ya mag-imoꞌ sa layaglayag na manggad pada awun pagkamangan nan, aw dun ni pig-imoꞌ nan, nyakaselat sakanan migpa-edeꞌ sa Madyaw na Ubat-ubat kan Kristu.
Na, walaꞌ kadugay pigkalatan na ginawa na eped na manga Judiyu si Pablo. Yanagaw nyalaguy sakanan lekat adti Tésalonika aw nyadtu ni Bérya. Manang dyumalug kanan ya manga Judiyu adti Bérya aw pigsutsutan nilan ya manga utaw dun pada maggubut. Yanagaw maksay sakanan pigpapalaguy na manga mangintu-uway aw dyumateng sakanan adti Aténas, aw tigkas yan nyadtu la uman sakanan ni Corinto. Manang si Silas aw si Timotiyo, migpatagak pa silan adti Bérya. Mabasa adti Manga Pigpan-imoꞌ na Manga Apostolés 17:1-15. Aw pigpalikuꞌ ni Pablo si Timotiyo adti Tésalonika na un pakabagsegen ya manga bagu na mangintu-uway dun. Aw talana ni Pablo adti Corinto, pigsulat nan ya tagnaꞌ na sulat adti manga mangintu-uway na awun ni Tésalonika.
Aw asini sulat nan yeiy, pigpalna-u ni Pablo ya paglikuꞌ ni Jisus, aw ya pagpakabetang na manga mangintu-uway kan Kristu dun ni allaw yan, dala uman ya pagdala nilan sa kanilan pag-eyaꞌ.