PHM intro

Pɔle Ná-Sɛʋɛi É Teʋeni

Filemɔn Ma

Sɛʋɛi lɔɔzeizuʋɛ ma woo mɔungiti

Sɛʋɛ zuɓuɠagi nii teʋegai Filemɔn ma, keelai Pɔle ɠa é sɛʋɛni (1:1). Pɔle ɠɛni kasoi ɠa, siɛgi zu é ɠɛni sɛʋɛi nii ɠɛɛzu la, kona ʋuulɔzita maazu ɠila (61) kɛɠala leʋegai ma, Kilista zɔlɔɔga ʋoluma. Efɛze nuiti ta-zɛʋɛi, ta Filipe nuiti tɔnɔi, ta Kolɔse nuiti tɔnɔi, naa ʋɛɛ Filemɔn nɔnɔi ʋa, ti-laasei pɛɛʋɛ ga kasoɠa zɛʋɛiti, tɔɔzei é ti zɛʋɛni siɛgi zu é ɠɛni la kasoi ɠa.

É sɛʋɛi nii leʋegɛ zunui ta ma, daa ga Filemɔn. Filemɔn ɠɛni ga Egilisii zu nui ta. Naa ʋolu é ɠɛni ga duɔ kɛɛɠɛi ta. Pɔle sɛʋɛi ɠɛɛni ma, ga é maanɛɛnɛ ga é mina faa zei ná-duɔi Wonezime ma, tɔɔzei naa ʋelani, é zeɠe Filemɔn ʋɔ bɛ. Ʋelei Wɔlɔme lɔgi zu vaiti ti ɠɛni la, zobogi ɠɛni Filemɔn ʋɛ ga é Wonezime ʋaa. Pɔle lada woozuɠulagiti boni, nii a kɛ Filemɔn iɲɔ ga é yeezei Wonezime wu, ga ɠɛɛɠɛloin ta, ta-ɓɔfaamai zu ta Kilista, é suvali vɔlɔ naa ma ga Filemɔn vaa bu, Wonezime ɗa botii ɠɛ Pɔle ɓɔɠɔi mu bɛ (1:13-14).

Unsosuʋɛ

1. Pɔle ná-tuʋɔ gooi laazeelini Filemɔn ma (1:1-3).

2. Naa ʋoluma, Pɔle maanɛɛnɛi wo Wonezime laaseigi zu ga Filemɔn yeezei bu ga ɠɛɛɠɛloin ta, ta-ɓɔfaamai zu ta Kilista (1:4-21).

3. Pɔle gaaɓelagɛ ga é kisu vai wo ma ga toɠa pɔ é li é laali ma, é ná-tuʋɔ gooiti daazeeli ma (1:22-25).