2TI intro

Pɔle Ná-Sɛʋɛi Velesiɛi É Teʋeni

Timɔte Ma

Sɛʋɛi lɔɔzeizuʋɛ ma woo mɔungiti

Timɔte ná-sɛʋɛi velesiɛi ɠa é ga sɛʋɛi velesiɛi nii keelai Pɔle teʋeni ná-kaladopoi Timɔte ma. Sɛʋɛi nii ɠɛɛʋɛ Pɔle ná-eteai ɠaaɓela siɛgi zu. É ɠɛni kasoi ɠa Wɔlɔme naama ziɛgi zu. Pɔleni ta Timɔte ti wola ɠilini ʋa, siɛ mɔinmɔin su é ɓena naa loli vɔlɔ ga ná-doun zunui (1Ti 1:2, 18; Fil 2:22).

Sɛʋɛi nii ɠa sɛʋɛ naanigɔiti saama niiti Pɔle ti leʋega nu ɠilagilagiti ma, kɛlɛ é la teʋeni Egilisi ma. Zɔ saʋagɔiti ta ga: Timɔte ná-sɛʋɛ mɔungi ta Tite nɔnɔi, naa ʋɛɛ Filemɔn nɔnɔi ʋa. Timɔte ná-sɛʋɛi velesiɛi nii ɠɛɛ ziɛgi zu, wɔinzeɠemai ɠa é ɠɛni keletiɛinti polu Wɔlɔme masa zooi zu ná pɛ. Kɛɛʋɛ eɠɛ naama vai maaʋele ɠa é kɛɛni Pɔle ɠɛni la kasoi ɠa, ta é ɠɛni Timɔte iɲɔdɔɔzu la ga naa yiilɔɔ kpɔlɔiti bu. É ɠɛni Timɔte ma ɓalaa, yeeɠɛɠala ɓaaɓaagiti ta ʋaazu (3:1).

Unsosuʋɛ

1. Pɔle tɔɔzeiʋɛ ga Timɔte luʋɔ fai (1:1-2), naa ʋoluma é naa iɲɔdɔɔ vai (1:3-18).

2. Naa ʋoluma é Timɔte zasulɔɔni ga naa yiilɔɔ kpɔlɔi zu (2:1-13).

3. É zɛba kalagi tanigaa ve zea é ʋilɛ kiti vai tanigaa ʋa (2:14-26).

4. É tooni ɠisu naa ʋolu é lo yeeɠɛɠalaiti ba ti ʋaazu, ta ʋelei a zoo ɓɔɠɔ zosu da naama ziɛgi zu ga pagɔ (3:1—4:8).

5. Pɔle ná-sɛʋɛi ɠaaɓelagɛ ga fai tanigaa é zumɔgai, é lo Timɔte ɓɔɠɔi ʋa (4:9-22).