ଏବ୍ରି
ଏବ୍ରୀମାନଙ୍କୁ ଲିଖିତ ପତ୍ର
ଏବ୍ରି ଲୋକାଙ୍ଗ୍ ରାସ୍ତିମାନି ଆକୁ
ଏବ୍ରି ଆକୁ ବିସୟ୍ତାନ୍ ଏସ ମାଟା
ଏବ୍ରି ଆକୁ ୱେଡ଼ିକା ସିନି ଉନ୍ଡ୍ରି ଆକୁ । ପାଡ଼ିଇ ନିୟମ୍ ଆଇଆଇ ବାବବାଣି ୱିଜୁ ପୁରା ଆତିମାନି ବିସୟ୍ ଇବେନୁ ମାନାତ୍ । ଇକା ଉନ୍ଡ୍ରି ଉପଦେସ୍ ୱାଜା । ଇବେନୁ ପୁରା ୬୦ ଦାନ୍ ନାଣ୍ତ ପାଡ଼ିଇ ନିୟମ୍ତି ବିସୟ୍କୁ ତେବାତେମାନେ । ଆମାକା ଜିସୁ କ୍ରିସ୍ତ ଏଣ୍ତେସ୍ୱାଜା ବାବବାଣି ମାରି ଜିହୁଦି ଜାଜକରି ପାଣି ପୁରା କିତାନ୍ ଇବେନୁ ମାପ୍ ପୋଇତାମାନାପ୍ ।
ଇୟା କାରଣତାନ୍ ଇକା ଜିହୁଦି କ୍ରିସ୍ଟାନ୍ ଲୋକାଙ୍ଗ୍ ସାହାସ୍ ସିନି ବଇ । ଏବ୍ରି ଆକୁଦୁ ତର୍ନାତ୍ ଜେ, ଜିସୁ ଏଣ୍ତେସ୍ ନିୟମ୍ ୱିସ୍ତାନ୍, ଏମେ ବାଦ୍ଲୁ ଜାଜକ ମାରିଡ଼େସି ଏସ୍କାଙ୍ଗ୍ ବଲି ପୁଜାସିଏନ୍ ମାରାନ୍ । ଜିସୁ କ୍ରିସ୍ତ ଆଜିନାନ୍ ୱିଜୁ ପାପ୍ତି ପୁଜାସିନିକାନ୍, ଇକା ଉନ୍ଡ୍ରେ ଦେବାନେ ୱିଜୁୱାଲେ ଉଣ୍ତିଙ୍ଗ୍ । ଇଲେଇତି ଦୁନିଆଦି କ୍ରିସ୍ଟାନ୍ ଲୋକା ଉଣ୍ତିଙ୍ଗ୍ ଏବ୍ରି ବଇଦୁ ସାହାସ୍ତିକା ତର୍ନାତ୍ । କେବଲ୍ କ୍ରିସ୍ତ ମାଙ୍ଗିଁ ମାପୁରୁଙ୍ଗୁଁ ଆସା କିନି ଉଣ୍ତିଙ୍ଗ୍ ପୁରା କିଦେଙ୍ଗ୍ ଆଟ୍ନାନ୍ । ମାରି ବା ୱାନିମାନୁ ଆସା କିଜି ୱେନ୍କା ବୁଲାନାଟ୍ ୧୨:୨ ।
ଏବ୍ରି ଆକୁ ଏନ୍ ରାସ୍ତାମାନାନ୍ ନେସ୍ଏର୍, ମାତର୍ ପଣ୍ତିତ୍କୁ ସିନ୍ତା କିନାର୍, ପ୍ରେରିତ ପାଉଲ, ଲୁକ, ମାରି ବର୍ଣ୍ଣବା ଆନାମାନାର୍ । ଇୟାତାନି ରାସାତି ବେଡ଼ା ବା ନେସ୍ଏର୍ ମାତର୍ ନାଣ୍ତ ଲୋକୁ ବିସ୍ବାସ୍ କିଜିନାର୍ ଇକା ଜିସୁ କ୍ରିସ୍ତଦି ଜନମ୍ ୱେନ୍କା ୭୦ ବାର୍ସୁଦୁ ରାସାତାମାନାତ୍ । ଜିରୁସାଲାମ୍ ମନ୍ଦିର୍ ୭୦ ବାର୍ସେକ୍ଦୁ ନାସ୍ଟୁ ଆତାତ୍, ମାତର୍ ଇୟା ଆକୁଦି ରାସ୍ତିକାନ୍ ଇକା ନାସ୍ଟୁ ଆଇ ମାନି ୱାଜା ଇନାନ୍ । ଏବ୍ରି ବଇ ଆନାତ୍ଜେ ରମୀୟ ଗାଡ଼୍ତୁ ରାସାତାମାରାତ୍ ୧୩:୨୪ ମାରି ଆଇଆଇ ମଣ୍ତଲିଦୁ ସିଆୟ୍ଆତାମାରାତ୍ ।
ଇୟା ଆକୁଦି ଏସ ମୁକ୍ୟ ବିସୟ୍
୧. ରାସ୍ତିକାନ୍ ତର୍ନା ସିନାନ୍ ଜେ, ଜିସୁ କ୍ରିସ୍ତ ଆଜିନାନ୍ ମାପୁରୁଦି ବାବବାଦି ମାରି ଦୁତ୍କା ମାଣାନ୍ ବା ପେରିକାନ୍ । ୧:୧–୪:୧୩
୨. ରାସ୍ତିକାନ୍ ତର୍ନା ସିନାନ୍ ଜିରୁସାଲମ୍ତୁ ସେବା କିଜିମାନି ଜାଜକରି ମାଣୁକୁ ବା ଜିସୁ ପେରିକାନ୍ । ୪:୧୪–୭:୨୮
୩. ମସାଦି ମାଣାନ୍ ଲୋକାଙ୍ଗ୍ ସିଆୟ୍ଆତିମାନି ନିୟମ୍ତି ପାଡ଼୍ଇ ନିୟମ୍ତି ମାଣାନ୍ ଜିସୁଦି ସେବା ପାଣି ପେରିକା । ୮:୧–୧୦:୩୧
୪. ରାସ୍ତିକାନ୍ ଜିସୁଙ୍ଗୁଁ ୱିଜୁମାନୁ ପେରିକାନ୍ ଇକା ବୁଜାକିଜି ଗାଦି ମାଟେଙ୍ଗ୍ ସିନାନ୍ । ୧୦:୩୨–୧୩:୧୭
୫. ରାସ୍ତିକାନ୍ ଇୟା ବଇଦୁ ସାହାସ୍ତି ମାଟେଙ୍ଗ୍ ନି ସାରାସାରି ମାଟା ସିଜି ୱିସ୍ତାନ୍ । ୧୩:୧୮-୨୫